بعدني وداعتك صدكني مامرتاح
والف حسبة بعدهة ابالي تتمشه
ياكل كلبي همك كل صبح كل يوم
ويرد بالليل يرجع حتى يتعشه
نتزاعل كبل كل مرة وارضه وياك
ولو كل مرة انتة التبدي بالحرشه
وماارمش جنت من يمي انته تصير
جنت اشتاك حتى بلحظه الرمشه
ابنيلك عشك بكليبي ليش اشبيك
تلزم كلبي كله بجفك تفلشه
تغفه براحتك كلما تريد تنام
وانه اسهر وأحس اشكد الك وحشه
وتجرحني الصبح لازم اشوف جروح
رغم هذا اجي وأتحضر الغبشه
أجيك وعندي شوك لشوفتك والكاك
شايلي جرح بأحساسي تنقشه
وتسألني على جرحي الفات ها ماطاب؟
أكلك اي شوية وترجع تخدشه
اضم دموعي ذمة بركبة العينين
واكلك هذا سري بكلبك تفرشه
وتلزم عيني انتة تلم عليه الناس
وتفضح سري كله بنصهم تطشه
صحتك انه احبك جسمي كله يصيح
درت ظهرك علي انطيت اذن طرشه
كلتلك هاك عمري البي ورد ذبلان
كلتلك دير بالك فدوة لاتعطشه
وعطشته وهملته ومااكتفيت بهاي
شفت كدامي عمري بجفك تحشه
اذا تكطع ورد من غصنه جثة يصير
ماينفع بعد بدموعك ترشه
مليتك صدك ماتحبني مااهواك
خلي الحب حلو ماريدك تغشه
مااحبك بعد كل حبي مات اليوم
وانته بهذا جفك شيلت نعشه